Fotos und Berichte vom JO-Lager 2016/2017
"Schlächt"-Wätter-Program
Zwar isch immer schön warm gsi und d'Sunne het immer gschune, jedoch heimer ke Schnee ka.
Därum simer a eim Tag ga chlättere wüus süsch chli längwilig isch immer uf de gliche zwöi veriiste Pistene z'fahre. Z'Gstaad inere höche, höche Chlätterhaue heimer dr ganz Namitag verbracht, hei gschwitzt und üsi Muskuchraft unger Bewiis gsteut.
Die wo nüm hei möge chlättere hei Rügge tötereschi und Zäiebrächereschi Kunststück usprobiert, mit meh oder weniger Erfoug.
Nach däm sehr asträngende Tag heimer es super feins Znacht dörfe ässe!
MERCI CHUCHI!
Silvester 2016
Am 31.12.16 simer dr ganz Tag ga Skifahre u Snowboarde. Nachdäm mir aui müed u erschöpft si heicho, simer ga duschä. Nachem Duschä heimer no rächt lang Freiziit gha u es paari vo üs hei no ghoufä dr Ruum z dekoriere.
Ächli speter hets när ändläch z'Ässä gä. Ufemnä Tisch hets Brathärdöpfeli, Sauce, Brot, Hackplätzli, Chääs und Gmües gä. Mir hei üs säuber ä Hamburger chönä zämästeuä. Nachem Z'Nacht heimer när no es Gruppäspiuu gschpiut. Es het 5 Gruppä gä. Mir hei verschideni Ufgabä müessä machä u hei für diä immer Pünkt vor Jury bescho.
Wo z'Spiuu fertig isch gsie simer aui usägangä wöu es isch scho haubi 12ii gsi. Wo aui dussä si gsi heimer aui es Glas gno u gwartet bises 00:00 isch gsi u när ufz nöiiä Jahr agschtossä. Nächär simer öppä no ä Stung dussä gsi u hei chli Party gmacht & tanzet.
U nächer si mer aui müed & erschöpft ga schlafä.
Es isch ä mega coole Tag gsii.
